иверская икона молитва акафист
Акафист Пресвятой Богородице пред иконой «Иверская»
Кондак 1
Взбранной Воеводе, Владычице нашей Богородице, похвальная пения приносим Ти раби Твои, яко пришествием честнаго образа Твоего стяжавшии щит крепкий, стену необоримую и стража неусыпна. Ты же, яко имущая державу непобедимую, покрый и защити нас, Владычице, от всех врагов видимых и невидимых и избави от всякаго вреда, душевнаго и телеснаго, да зовем Ти:
Радуйся, благая Вратарнице, двери райския верным отверзающая.
Икос 1
Ангел предстатель послан бысть рещи Богородице, егда паде Ей жребий апостольскаго служения в земли Иверстей: «Не разлучайся Иерусалима, жребий же, Тебе падший, просветится в последния дни, Ты же имаши потрудитися в земли, юже Тебе Бог изволит».
Темже радуйся, Еюже Евангелие благовестится; радуйся, Еюже идольская прелесть упразднится.
Радуйся, Еюже власть князя тьмы разрушится; радуйся, Еюже Царство Христово утвердится.
Радуйся, падших во тьму идолослужения к свету Евангелия воззвание; радуйся, от рабства диаволу в свободу славы чад Божиих приведение.
Радуйся, готовая служительнице Сына Своего и Бога; радуйся, послушанием преслушание Евы исцеляющая.
Радуйся, высото добродетелей; радуйся, глубино смиренномудрия.
Радуйся, Еюже невернии познают Творца; радуйся, Еюже вернии усыновляются Отцу.
Радуйся, благая Вратарнице, двери райския верным отверзающая.
Кондак 2
Видящи Святая Дева дивное и новое о Себе промышление Божие, яко раба Господня, присно готовая творити волю Его, возопи: Аллилуиа.
Икос 2
Разум недоразумеваемый глагола ангельскаго разумен Тебе, Пречистая, творя Господь, управи шествие Твое к Горе Афонстей, идеже проповедася Тобою Евангелие, и тако явися жребий Твой. Мы же радостно вопием:
Радуйся, освятившая Афон Своим пришествием; радуйся, низложившая тамо идолов.
Радуйся, насадившая тамо веру истинную; радуйся, неверие отгнавшая.
Радуйся, в жребий Себе Гору сию избравшая; радуйся, благодать сему месту обещавшая.
Радуйся, верным, живущим в ней, подательнице земных благ; радуйся, споручнице вечнаго их спасения.
Радуйся, теплая ходатаице о живущих в жребии Твоем; радуйся, всех врагов их устрашение.
Радуйся, милость Сына Своего до скончания века месту сему обещавшая; радуйся, благодать Его неотступною быти предрекшая.
Радуйся, благая Вратарнице, двери райския верным отверзающая.
Кондак 3
Сила Вышняго заступлением Богоматере осени Святую Гору и удолия и дебри ея, яко село пространное показа всем, в иночестей жизни хотящим жати спасение, внегда пети сице: Аллилуиа.
Икос 3
Имущи промышление о жребии Своем, людех Иверския земли, устроила еси в месте, идеже Сама к Афону пристала еси, обитель роду их, в тихое пристанище ищущим спасения, хотящи даровати ей в щит и ограждение икону Свою, да вси взывают:
Радуйся, пославшая проповедницу Евангелия в землю Иверскую; радуйся, обратившая сию страну от прелести идольстей к свету Христову.
Радуйся, Отрасли неувядаемыя розго, дивную лозу Нине даровавшая; радуйся, от нея произрастившая гроздие чудес и благия веры.
Радуйся, сад духовный на Афоне насадившая; радуйся, струю от него просвещения духовнаго стране Иверстей источившая.
Радуйся, Евфимия златословесная уста; радуйся, Торникия непобедимая крепосте.
Радуйся, всех благочестивых укрепление; радуйся, иноков ограждение.
Радуйся, тихое пристанище ищущих спасение; радуйся, вечный покой им уготовляющая.
Радуйся, благая Вратарнице, двери райския верным отверзающая.
Кондак 4
Бурю внутрь имущи помышлений сумнительных, честная вдовица, яже в Никеи, смятеся, зрящи копием воина-иконоборца прободену святую и чтимую икону Богоматере и абие источившу кровь и, страхом обдержима, да не поругана будет святая икона, с молитвою слезоточащи вверже ю в море. Увидевши же ю прямо верху воды путь творящу и текущу к западу, возопи с веселием: Аллилуиа.
Икос 4
Видеша иноцы Святыя Горы явльшийся в мори яко пламень, яко столп огнен, егоже верх досязаше небеси, яко солнце сияющее, и в нощи притекоша к краю моря и, видевше святую икону Богоматере, по морю носимою силою свыше, возопиша Благодатней:
Радуйся, Купино, Законоположником предзримая; радуйся, столпе огненный, наставляяй сущия во тьме.
Радуйся, лествице, досязающая до Небес, еюже сниде Бог; радуйся, мосте, преводяй сущих от земли на Небо.
Радуйся, заре таинственнаго дне; радуйся, Звездо, являющая Солнце.
Радуйся, Свет Неизреченный родившая; радуйся, еже како ни единаго же научившая.
Радуйся, облеченная в солнце, сияющая благодатию и славою всей вселенней; радуйся, молние, души просвещающая и верных смыслы озаряющая.
Радуйся, светлосте, во тьме светящая; радуйся, яко многосветлое возсияваеши просвещение.
Радуйся, благая Вратарнице, двери райския верным отверзающая.
Кондак 5
Боготечную икону Свою дати хотящи Иверстей обители, рекла еси, Богомати, преподобному Гавриилу: «Иди с ликом иноков к берегу моря, сниди в пучину и приими икону Мою». Он же, верою и любовию окриляемь, по воде, аки по суху, ходя, прият ю во объятия своя и, достиг сокровища, иным недостижимаго, в достояние иноков рода своего иверскаго, веселяся, пояше: Аллилуиа.
Икос 5
Видеша иноцы иверстии многажды икону Богоматере из храма верху врат монастырских на стену града незримою силою изнесенную, ужасахуся и стояху, зовуще к Ней таковая:
Радуйся, святую икону дати нам изволившая; радуйся, покров ю быти нам обещавшая.
Радуйся, любовь Твою к обители нашей показавшая; радуйся, благое о ней промышление явившая.
Радуйся, помощь наша в чуждей стране; радуйся, в странствии нашем утешение.
Радуйся, Божие к нам благоволение; радуйся, наше к Богу дерзновение.
Радуйся, слез наших избавление; радуйся, сирых нас защитнице.
Радуйся, ограждение наше; радуйся, едина радосте наша.
Радуйся, благая Вратарнице, двери райския верным отверзающая.
Кондак 6
Проповедника творящи Гавриила воли Своея, рекла еси к нему, Владычице: «Не приидох хранима быти от вас, но да буду Аз хранительница ваша не токмо в настоящем, но и в будущем веце. Се даю вам знамение: дондеже зрите в монастыре икону Мою, не оскудеет вам благодать Сына Моего и милость, да вопиют Ему вси: Аллилуиа».
Икос 6
Возсия радость велия слышавшим Твоя, Богомати, обетования, и Тебе, Небесней Вратарнице, храм во вратех обители с веселием иноцы воздвигоша и возопиша тако:
Радуйся, хранительнице наша в настоящем веце; радуйся, предстательнице наша в будущем.
Радуйся, страху Божию нас научающая; радуйся, на путь добродетели наставляющая.
Радуйся, дерзновение наша и надеждо; радуйся, упование наше и покров.
Радуйся, благоутробие Сына Своего к нам преклонившая; радуйся, благодать Его неоскудно пребывати с нами возвещающая.
Радуйся, святую икону залогом милости давшая; радуйся, дар чудодействия ей даровавшая.
Радуйся, прилог всякаго зла от обители отражающая; радуйся, всему благому вход отверзающая.
Радуйся, благая Вратарнице, двери райския верным отверзающая.
Кондак 7
Хотящу иногда злочестивому Амире обитель Иверскую разорити и стадо иноков, тамо собранное разсеяти, скоро позна крепкое обители заступление от Богоматере, увидев корабли своя в пучине моря погрязшия и ратники изгибшия. И пришед со смирением, сребро и злато в обитель даяше, молитвы прося. Иноцы же, видевше сия, возопиша к Богу: Аллилуиа.
Икос 7
Новыя и безчисленныя чудеса показа Богомати, в обители оскудение вина, муки и елеа восполняющи, бесныя исцеляющи, хромым хождение дарующи, слепым прозрение и всяк недуг врачующи, да, видяще чудеса сия, воспевают Тебе:
Радуйся, взбранная Воеводо, враги побеждающая; радуйся, скорая на помощь призывающим Тя.
Радуйся, не презирающая моления нашего; радуйся, обещания Своего не отступающая.
Радуйся, скорбь обители в радость претворяющая; радуйся, оскудение обители восполняющая.
Радуйся, слепых прозрение; радуйся, хромых хождение.
Радуйся, всех немощных целительнице; радуйся, всех скорбных утешительнице.
Радуйся, яко не престаеши промысляющи и спасающи нас; радуйся, яко от толиких бед избавляеши нас.
Радуйся, благая Вратарнице, двери райския верным отверзающая.
Кондак 8
Странно покрываемую от иконы Богоматере обитель Иверскую слышав Патриарх Никон, вожделе и Российстей стране благодати Ея стяжати причастие; сего ради, создав обитель в честь славнаго образа, со тщанием испроси изображение чудотворнаго образа Богоматере, да, покровом Ея защищаеми, вопиют Богу: Аллилуиа.
Икос 8
Вся сущи в Вышних, но и нижних не отступающи, благоизволила еси, Богомати, якоже древле преподобному Антонию даровася благословение Горы Афонския на утверждение обители Печерския, даровати и новой обители в стране Российстей благодать Свою, еюже благословила еси Афон, в подобии честнаго образа Твоего. Темже взываем Ти:
Радуйся, страны Российския покрове, ширший облака; радуйся, православныя веры в ней ограждение и утверждение.
Радуйся, Православныя Церкве непоколебимый столпе; радуйся, ересей и расколов обличение.
Радуйся, светлыми лучами чудотворных икон всю страну озаряющая; радуйся, дары исцелений и милостей от них источающая.
Радуйся, врагов устрашение; радуйся, святителей веселие.
Радуйся, иереев похвало; радуйся, иноков наставнице.
Радуйся, всего рода нашего спасение; радуйся, верных утверждение.
Радуйся, благая Вратарнице, двери райския верным отверзающая.
Кондак 9
Всяко тщание имуще о написании честнаго образа милостивыя Вратарницы, сонм постников иверских молебная пения совершает, водою от чудныя иконы омывает дску, на нейже имать изобразитися честный образ, и преподобнаго Иамвлиха освящает, иже, подвизався в посте, молитве и бдении со всею братиею, списа вапы, святою водою и мощами освященными, честное изображение Богоматере, выну моляся и вопия Богу: Аллилуиа.
Икос 9
Вития многовещанныя, яко рыбы безгласныя, видим о Тебе, Богородице: недоумеют бо, како по достоинству похвалити вся чудеса Твоя, явленная роду нашему от святыя Твоея иконы, еще бо на пути в Российскую страну сия чудодействоваше, благочестивому Мануилу повелевая выкуп дати неверным, возбраняющим шествие святыя иконы в страну Русскую, и сугубо ему послежде отдавши. Мы же, дивящеся, верно вопием Ти:
Радуйся, источниче чудес неисчерпаемый; радуйся, всякия милости подательнице.
Радуйся, всегда теплая о нас ходатаице к Богу; радуйся, промышления Его о нас сокровище.
Радуйся, сущим в бедах прибежище; радуйся, скорбящих утешение.
Радуйся, больных исцеление; радуйся, немощных укрепление.
Радуйся, вдов заступление; радуйся, сиротствующих милосердая Мати.
Радуйся, заблуждающих на путь истины обращение; радуйся, грешников к покаянию воззвание.
Радуйся, благая Вратарнице, двери райския верным отверзающая.
Кондак 10
Спасти хотящи многия люди от бед и скорбей, источаеши, Богомати, неоскудный источник милости от Своея иконы роду нашему: се бо и в стольном граде Москве благая Вратарница являешися всем поклоняющимся Тебе, скорое вспоможение подавающи, и в новой обители Иверстей благодати струи от иконы Твоея испущаеши, и во иных градех, обителех и весех чтущим Тя полезное прошение исполняющи. Темже, прославляя Бога, давшаго нам благодать таковую, вопием Ему: Аллилуиа.
Икос 10
Стена еси иноческому чину, Богородице, и всем, к Тебе прибегающим, ибо Небесе и земли Творец, вселься в девственней утробе Твоей, научи всех чистоты и целомудрия ревнителей возглашати Тебе:
Радуйся, девства сосуде избранный; радуйся, чистейший образе целомудрия.
Радуйся, чертоже безсеменнаго уневещения; радуйся, Невесто неневестная.
Радуйся, Сеятеля чистоты рождшая; радуйся, верных Господеви сочетавшая.
Радуйся, в буре искушений скорая помощнице; радуйся, прилоги врага отражающая.
Радуйся, мглу душевредных страстей отгоняющая; радуйся, помыслы очищающая.
Радуйся, земныя сласти презирати научающая; радуйся, к горнему умы и сердца направляющая.
Радуйся, благая Вратарнице, двери райския верным отверзающая.
Кондак 11
Пение всякое побеждается, спростретися тщащееся ко множеству многих щедрот Твоих; равночисленныя бо песка песни аще приносим Ти, Владычице наша Богородице, ничтоже совершаем достойно, яже подаваеши нам, о Тебе вопиющим: Аллилуиа.
Икос 11
Светоприемную свещу, сущим во тьме бед явльшуюся, зрим святую икону Богоматере; невещественный бо огнь благодати приемлющи, лучами чудес всех озаряет, научающи сице взывати Благословенней:
Радуйся, во всяких нуждах скорое вспоможение; радуйся, в печалех быстрое услышание.
Радуйся, от огня, меча и нашествия иноплеменных нас избавляющая; радуйся, от глада и напрасныя смерти нас свобождающая.
Радуйся, от язвы и всегубительства смертнаго нас соблюдающая; радуйся, бедствующим в пути, на суше и на водах внезапное вспоможение.
Радуйся, язв душевных и телесных врачевание; радуйся, оставленных врачми в Свои руце приемлющая.
Радуйся, милосердая утешительнице всех скорбящих и обремененных; радуйся, не отвергающая всех презренных и отверженных.
Радуйся, самых отчаянных из рова погибели исхищающая; радуйся, и мене, обнаженнаго добрых дел, не оставляющая Своим покровом и заступлением.
Радуйся, благая Вратарнице, двери райския верным отверзающая.
Кондак 12
Благодати дати восхотев, долгов древних, всех долгов Решитель человеком, прииде Собою ко отшедшим Того благодати и, раздрав рукописание, дарова нам крепкое Богоблагодатное ходатайство, да вопием вси молитвами Ея: Аллилуиа.
Икос 12
Поюще Твоя чудеса, являемая нам в жизни сей, хвалим Тя, Богородице, яко милости источник неисчерпаемый. Но, припадающе к Тебе пред чудотворною иконою Твоею, молим Тя смиренно: буди нам покров и защищение и в день кончины нашея, и егда имамы предстати на суд страшному престолу Сына Твоего, да вопием Ти:
Радуйся, во славе приседящая престолу Сына Твоего и тамо нас воспоминающая; радуйся, с Сыном Твоим и Богом вечно царствующая и о нас ходатайствующая.
Радуйся, уповающим на Тя конец живота непостыден дарующая; радуйся, безболезненную и мирную кончину устрояющая.
Радуйся, мытарств горьких избавление; радуйся, от власти князя воздушнаго освобождение.
Радуйся, грехов наших непоминовение; радуйся, по Господе упование нам блаженныя жизни.
Радуйся, уповающим на Тя одесную Сына Твоего стояние устрояющая; радуйся, блаженнаго гласа Онаго, Небеснаго Царствия наследие обещающаго, слышати сподобляющая.
Радуйся, благая Мати, всех, чтущих Тя, жити с Собою вселяющая; радуйся, крепкая надеждо вечнаго спасения всем христианом.
Радуйся, благая Вратарнице, двери райския верным отверзающая.
Кондак 13
О, Всепетая Мати, Пресвятая Госпоже Дево Богородице! Призри на нас, приносящих смиренно со слезами малыя сия молитвы пред пречистым Твоим образом и все упование и надежду возложивших на Тя, и избави нас всех бед и напастей в животе сем и будущия изми муки, да, спасаемии Тобою, вопием выну: Аллилуиа.
Этот кондак читается трижды, затем 1-й икос «Ангел предстатель…» и 1-й кондак «Взбранной Воеводе…».
Молитва
О, Пресвятая Дево, Мати Господа, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию поклоняющихся пречистому образу Твоему. Се бо, грехми погружаемии и скорбьми обуреваемии, взирающе на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о, Мати всех скорбящих и обремененных! Помози нам немощным, утоли скорбь нашу, настави на путь правый нас, заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину и на Страшнем Суде Сына Твоего явися нам милосердая заступница, да всегда поем, величаем и славим Тя, яко благую заступницу рода христианскаго, со всеми угодившими Богу. Аминь.
Акафист Пресвятой Богородице перед иконой «Иверской Монреальской»
Кондак 1
Избранной от всех родов Заступнице рода христианскаго, даровавшей нам чудное знамение от иконы Своея честныя и миро благовонное от нея источившей, благохвальное пение приносим во умилении сердечнем. Ты же, яко имущая владычество над тварию всякою, обновление сердца и жития подаждь нам, зовущим:
Радуйся, благая Вратарнице, двери райския верным отверзающая.
Икос 1
Ангелом говейная икона Твоя, о, Владычице, возсия нам в последняя времена сия, яко источник благодати Божественныя неистощимый, да вси вернии, с любовию припадающии Тебе и пред образом сим благоговейно кланяющиися, возопиют Тебе песнь похвальную сице:
Радуйся, Дево, от века Господом предызбранная; радуйся, от взора человеча до времени премудро утаенная.
Радуйся, дщи Адама перстнаго; радуйся, праматери Евы исправление.
Радуйся, в естестве отпадшем рожденная; радуйся, превыше ангельскаго естества добродетелию вознесенная.
Радуйся, в гаданиих пророки предобразованная; радуйся, рождеством Твоим сеновное служение упразднившая.
Радуйся, от неплодове пречудно возсиявшая; радуйся, плодоносие духовное верным даровавшая.
Радуйся, чаяний древних преславное сбытие; радуйся, и в последняя времена живущих надеждо последняя.
Радуйся, благая Вратарнице, двери райския верным отверзающая.
Кондак 2
Видяще миро, от иконы Твоея источенное, все множество молящихся пред образом святым ужасом и радостию исполняется и теплыя слезы от сердца сокрушеннаго приношает Тебе, яко жертву благодарения, да не уничижится предстательством Твоим к Сыну Твоему умиленный их глас: Аллилуиа.
Икос 2
Разум наш немощный недоумевает преславнаго чудесе изречения, како миро благоуханное, множицею от иконы Твоея источенное, аще единожды вкупе собрано будет, седмерицею тяготою своею сам образ превзыдет, мы же, таинству дивящеся, благодарно славословим Тя сице:
Радуйся, благодати источниче неисчерпаемый; радуйся, чистотою безмерною Безмерному послужившая.
Радуйся, Невместимаго всем миром вместившая; радуйся, Неописаннаго описана показавшая.
Радуйся, в Вышних Живущаго к нам приведшая; радуйся, к восхождению на Небеса человеком послужившая;
Радуйся, Рабо Господня смиренная; радуйся, Владычице чиноначалий ангельских.
Радуйся, во святая святых воспитанная; радуйся, ни единаго же помысла возносливаго приемшая.
Радуйся, Ангелом обрадованная; радуйся, во юдоли плачевной на земли пребывавшая.
Радуйся, благая Вратарнице, двери райския верным отверзающая.
Кондак 3
Сила Вышняго и до ныне не оскуде, аще и оскудеша вернии и умалишася зело, но покровом Твоим присно покрываеми, Сына Твоего гнев праведный приложити на милость чаем, вопиюще Ему: Аллилуиа.
Икос 3
Имуще богатство неизреченныя милости Твоея, туне от иконы Твоея дарованныя, страхом исполняемся, грешнии, яко неисправлени пребываем, обаче паки на милость Твою дерзающе, со слезами, Владычице, к Тебе вопием: да не в суд или во осуждение чудес Твоих зрение нам вменится, но да поне наконец очищенным сердцем сподобимся и мы воспети Тебе таковая:
Радуйся, Агнице, Агнца кроткаго рождшая; радуйся, яко от Иуды льва миру явившая.
Радуйся, Бога безтелеснаго во чреве нетесновместившая; радуйся, плотию человеческою Того одеявшая.
Радуйся, Материю ставшая и Девою пребывшая; радуйся, во двою естеству единаго Сына Твоего нам показавшая.
Радуйся, благословения Отча приятелище; радуйся, Духа Святаго ковчеже преисполненный.
Радуйся, сластьми душетленными неискушенная; радуйся, болезней матерних в рождестве не познавшая.
Радуйся, грехопреклоннаго естества наследнице; радуйся, николиже насильству его уступившая.
Радуйся, благая Вратарнице, двери райския верным отверзающая.
Кондак 4
Бурею христоубийства дышуще, приидоша в дерзновении мнозе копроними новии, за грехи наша на земли Русстей Богом попущеннии, олтари отеческия раскопаша и служителей Господних избиша, чад же их лестию безбожия развратиша и немнози вернии во отечествии и на земли чуждей сохранишася. Ты же, Владычице, не оставила еси их, но дивным явлением иконы Своея утешаеши со слезами Богу вопиющих: Аллилуиа.
Икос 4
Слыша о чудесех преславных, от иконы Твоея истекающих, весь мир, от Христа отрекшийся, недоумением одержимь безмолвствует, ничтоже бо возможет вопреки глаголати: вернии же, спасение Тобою улучивше, немолчными песньми вопиют Ти сице:
Радуйся, благоверным царем державо; радуйся, воинству христолюбивому Воеводо победоносная.
Радуйся, нечестивым агаряном присное посрамление; радуйся, многажды ратующия на люди Твоя разгнавшая.
Радуйся, грады православныя от нашествия вражия покрывавшая; радуйся, к покаянию и молитве люди Твоя дивно наставлявшая.
Радуйся, избранным молебником Твоим во славе являвшаяся; радуйся, волю Божию о спасении всех верных теми возвещавшая.
Радуйся, гнев Божий от нас утолившая; радуйся, до конца погибнути во гресех нам не давшая.
Радуйся, вдовствующаго престола царскаго на земли Местоблюстительнице; радуйся, Царице, с Сыном Твоим на Небеси присно царствующая.
Радуйся, благая Вратарнице, двери райския верным отверзающая.
Кондак 5
Боготечною звездою верным сияеши, в разсеянии сущим, Владычице, иже сугубое изгнание терпящим: от рая отпавшим Адамовым прослушанием, от земнаго же удела Твоего Руси Святей промышлением Божиим изгнанным за грехи отеческия, да поне земнаго града лишеннии Небеснаго взыщем вседушно, идеже воспети некогда чаем: Аллилуиа.
Икос 5
Видеша вси концы земнии величие чудес Божиих, от иконы Твоея истекающих, и чудяхуся многому милосердию Твоему, о, Владычице, разумеюще же нецыи от них, яко един есть Бог истинен, Сын Твой со Отцем и Духом покланяемый, вопияху Тебе сице:
Радуйся, истины скрижаль богописанная; радуйся, благодати подаяние независтное.
Радуйся, Церкве Православныя утверждение; радуйся, неведующим благое вразумление.
Радуйся, от всех родов ублаженная; радуйся, разстоящия Сыном Твоим собравшая.
Радуйся, чаяний ветхаго Израиля исполнение; радуйся, новым израильтяном Мати явльшаяся.
Радуйся, неверных иудеев посрамление; радуйся, новый народ Божий от всех язык совокупльшая.
Радуйся, Подательнице благ преходящих; радуйся, Хранилище сокровищ неиждиваемых.
Радуйся, благая Вратарнице, двери райския верным отверзающая.
Кондак 6
Проповедника чудес Твоих и хранителя иконы Твоея в разсеянии Русстем не епископа, не князя, ниже монашествующих наставника избрала еси, но проста и иноплеменника родом, яко да никтоже по плоти похвалится пред Богом, но о сем да хвалится хваляйся, еже знати Господа и взывати Ему православно: Аллилуиа.
Икос 6
Возсиял еси всем концем земли свет православныя веры: Сын бо Твой по глаголу Твоему изгнанники смиренныя вознесе и теми во всяком языце алчующия благ духовных исполни, да вкупе вси вопиют Тебе таковая:
Радуйся, апостолы древле иконою Твоею благословившая; радуйся, благодатию Сына Твоего образы Твоя снабдившая.
Радуйся, поклонение пред иконами Твоими приявшая; радуйся, на первообразная тое направляти нас наставльшая.
Радуйся, Спутнице незримая всем благовествующим; радуйся, укрепление чудное словесем их человеческим.
Радуйся, копронимову ярость укротившая; радуйся, лютерово нечестие низложившая.
Радуйся, от уязвленныя иконы древле кровь излиявшая; радуйся, от честно поклоняемаго списка тоя миро источившая.
Радуйся, злобою движимым устрашение; радуйся, Духом Святым водимым укрепление.
Радуйся, благая Вратарнице, двери райская верным отверзающая.
Кондак 7
Хотящим всем силам бездны адския веру православную до конца низложити дивное заступление остатку верных показала еси, Владычице, но и заблуждающим во тьме неверия милость Твою простираеши, да видяще очима своима чудеса древних краснейшая, умилятся сердцем и, мрак неверия разгнавше, Сыну Твоему возопиют: Аллилуиа.
Икос 7
Новые звезды на Небе духовнем Руси Святыя возсияша все множество страдалец от лютых христоборцев умученных, егда же и на земли новыя песни церковныя в похвалу их воспеты быша, тогда и икона Твоя миро начат изливати, знаменуя волю благую Господню о всецерковнем прославлении сих угодников верных Его, иже непрестанно во свете предстоят невечернем, ходатайствующе о вопиющих Ти таковая:
Радуйся, древле Исаиею пророком предзренная; радуйся, даже до смерти лютыя от богоотступных тем воспеваемая.
Радуйся, от напастей нечаянных избавление; радуйся, в попущенных нам от Господа скорбех укрепление.
Радуйся, милостию Твоею к покаянию приводящая; радуйся, скорбными лечбами язвы наша греховныя врачующая.
Радуйся, мучеников пресветлая похвало; радуйся, страдалец победоносных укрепление.
Радуйся, любящих Тя крестами венчающая; радуйся, поющия Ти прославляющая.
Радуйся, благая Вратарнице, двери райския верным отверзающая.
Кондак 8
Странное и непостижимое промышление Господне о рабех Его в разсеянии русстем сущих людие православнии уразумеша, егда Ты, Владычице, чудоточное миро от иконы Твоея источивши, верныя Твоя возвеселила еси, вопиющия о Тебе: Аллилуиа.
Икос 8
Весь бе в нижних помышлением своим всяк благолепием внешним церковные точию хваляйся, и в дружестве с сильными мира сего залог благоденствия Церкве Христовой возмневший, мы же паче о Небесном заступлении Твоем, Владычице, всяческое тщание приложим, взывающе Ти таковая:
Радуйся, мудрыя умом своим юроды показавшая; радуйся, твердого упование нашего не посрамившая.
Радуйся, лукавых наветов отгнание; радуйся, простоты сердечныя благое венчание.
Радуйся, Хитродетеля всяческих рождшая; радуйся, вся хитросплетения человеческия лжи растерзавшая.
Радуйся, миролюбцем присноневедомая; радуйся, уповающим на Тя тайнозрение даровавшая.
Радуйся, сильныя века сего со престол низложившая; радуйся, смиренныя преславно вознесшая.
Радуйся, света и истины Мати; радуйся, всякия лести и тьмы прогнание.
Радуйся, благая Вратарнице, двери райския верным отверзающая.
Кондак 9
Всякое естество человеческое да подвижится к похвалению Сына Твоего и пению множества щедрот Твоих, Владычице, и да не ищут утешеннии Тобою утешения инуде, но немолчным гласом да поют: Аллилуиа.
Икос 9
Ветия суемудреннии и пророцы лживии приидоша в последния дни сия, именем Твоим прелестная глаголюще и откровения от духа нечистаго приводяше, аки быша Тебе Самую видели, обаче вси, разумеюще чудес Твоих истинных бездну, суесловию сему веры не имут, вопиюще Тебе непрестанно:
Радуйся, кроткая Царице; радуйся, николиже Себе величавшая.
Радуйся, всеми роды блажимая; радуйся, никогоже поклонитися Тебе понуждавшая.
Радуйся, посреде собора апостолов безмолвствовавшая; радуйся, молчанием Твоим паче словесе назидавшая.
Радуйся, истинныя Премудрости Божия Мати; радуйся, с Сыном и Богом Твоим присно царствующая.
Радуйся, существа Божественнаго присвоити Себе не дерзавшая; радуйся, истиннаго обожения по благодати паче всех сподобльшаяся.
Радуйся, на Суде Сына Твоего Ходатаице последняя; радуйся, помышлением о судищи сем многия от погибели исхитившая.
Радуйся, благая Вратарнице, двери райския верным отверзающая.
Кондак 10
Спасти хотя иногда икону Твою чудотворную от поругания нечестивых, преславно волною морскою понесла ю еси и иноком Горы Афонския в столпе светлом правошествующу по пучине даровала еси, но и списки с нея многими чудесы прославила еси, да вси благодарно зовут Богу: Аллилуиа.
Икос 10
Стена еси, Дево, православныя веры и благочестия истиннаго утверждение, аще бо и спеется путь нечестивых и вси творящии беззаконие угобзишася. Ты же паки путь един ко спасению показуеши, еже во исповедании правом стояти неколебимо и Тебе воспевати таковая:
Радуйся, вся рабом Твоим к пользе творящая; радуйся, истинную пользу душ наших добре ведущая.
Радуйся, от явления славы Твоея немощь нашу щадящая; радуйся, боголепную славу Твою зраком иконы скрывающая.
Радуйся, избранником Твоим иногда яве представшая; радуйся, священный трепет их скоро на радость преложшая.
Радуйся, немогущих зрети славы Твоея в тихости милующая; радуйся, миром чудным в тойже трепет нас приводящая.
Радуйся, чудесы Твоими кроткими к покаянию нас наставляющая; радуйся, в вере истинней теми нас утверждающая.
Радуйся, удивления празднаго от нас не приемлющая; радуйся, всецелаго обращения от всея души нашея взыскующая.
Радуйся, благая Вратарнице, двери райския верным отверзающая.
Кондак 11
Пение хвалебное приношает Ти Русь Православная, не точию бо в разсеянии, но и во отечествии сущии раби Твои уведеша преславная чудеса от мироточивыя Твоея иконы и, яко сокровища многоценныя, мироуханныя струицы сохраняху, на мнозех летех благовония от них обоняюще, Богу же воспевающе: Аллилуиа.
Икос 11
Светоприемную свещу икону Твою даровала еси нам, Владычице, во тьме нечувствия пребывающим и в земных вещех утешение ищущим, но не обретающим, да возбнув от омрачения греховнаго, очи своя горе возведем, Тебе же возопием таковая:
Радуйся, слезы от икон Твоих о нас источающая; радуйся, и нам слезы покаяния подающая.
Радуйся, горьким скорби врачевством нас исцеляющая; радуйся, на радость печаль нашу прелагающая.
Радуйся, православнаго отечествия лишение за грехи нам попустившая; радуйся, истинное Отечествие Небесное всем скорбящим о том уготовившая.
Радуйся, узами скорбей от греховных тенет разрешающая; радуйся, знамением благосердия Твоего терпеливыя утешающая.
Радуйся, единою мира каплею многия на земли веселящая; радуйся, море неисчерпаемое мира мысленнаго на Небеси имущая.
Радуйся, молитвы хладныя нашея согреяние; радуйся, ума землеретнаго к Небеси возведение.
Радуйся, благая Вратарнице, двери райския верным отверзающая.
Кондак 12
Благодати Твоея и щедрот насыщеннии обильно не приложения даров Твоих просим, Владычице, но паче еже прияти нам дары сия неосужденно и не истязанным быти нам о презорстве и небрежении в час судный, но, яко раби блазии и вернии, выну сподобимся Господу пети: Аллилуиа.
Икос 12
Поюще милосердие Твое превыше небесное, восхваляем Тя, Богородице, яко благую Заступницу нашу, в веце сем и в будущей жизни сладость нашу неизреченную, темже и вопием Ти таковая:
Радуйся, милостию Твоею помышление всяко смиряющая; радуйся, страхом суда неужасно устрашающая.
Радуйся, радостотворнаго плача подание; радуйся, смехотворства безумнаго угашение.
Радуйся, дмение помыслов разгоняющая; радуйся, смирение лобзающих возносящая.
Радуйся, покаяния предсмертнаго сподобляющая; радуйся, кончину христианскую подающая.
Радуйся, на мытарствах воздушных верныя покрывающая; радуйся, едина надеждо души, от тела разлучившияся.
Радуйся, грехов оставления просящим Ходатаице; радуйся, Небесныя награды дарование независтное.
Радуйся, благая Вратарнице, двери райския верным отверзающая.
Кондак 13
О, Всепетая Мати, от честных кровей Твоих Слово воплощенное рождшая и от иконы Твоея честныя миро источившая многоцелебное, нынешнее наше пение приими милостивно, яко да на земли дары Твоя благим усердием приемше, и Небесных Твоих благ не лишени будем, Сыну Твоему вопиюще о Тебе: Аллилуиа.
(Этот кондак читается трижды, затем икос 1 и кондак 1)
Молитва к Пресвятой Богородице перед Ея иконой, именуемой «Иверская Монреальская»
О, Преславная Госпоже, Царице Небесе и земли, Дево Богородице! Пред честною иконою Твоею ныне припадающе, умиленным сердцем вопием Тебе малое моление сие наше, яко раби неключими есмы, осуждение прияти имущии, но Твоим всемощным ходатайством Судии умилостивления чающии. Веруем и уповаем, Владычице, яко не хотяй смерти грешных Сын Твой ходатайству Твоему внемлет, и ныне известихомся о сем чудным знамением от иконы Твоея мироточивыя, от неяже и исцеления обильно источила еси всем с верою и любовию к Тебе притекающим. Сего ради и вопием Тебе со слезами: пощади окаянство наше, прости нам неверность нашу, сокруши гордыни нашея превозношение, отжени нечувствие от сердец ожесточенных, призри на воздыхание унынием боримых, уцеломудри нас будущаго воздаяния ожиданием. И подаждь, Госпоже, Церкви нашей в истине неколебимое стояние и в любви благое возращение, от всех козней бесовских и суемудрии еретических покрый нас и расточенныя верныя собери воедино, да вси на земли православно Тя славящии и в Небесных чертозех воспети сподобятся всечестное имя Святыя Троицы и Твое милостивное о нас заступление во веки веков. Аминь.