канон иконе умиление псково печерская
Канон Канон Пресвятой Богородице пред иконою Ея, нарицаемою Умиление или Радость Всех Радостей
К Богоро́дице со умиле́нием припаде́м, / вси, грехми́ обремене́ннии, / чудотво́рную Ея́ ико́ну Умиле́ния облобыза́юще / и вопию́ще со слеза́ми: / Влады́чице, приими́ моле́ние недосто́йных раб Твои́х / и пода́ждь нам, прося́щим, / ве́лию Твою́ ми́лость.
Канон Пресвятыя Богородицы, глас 4.
Песнь 1.
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.
Припев: Пресвята́я Богоро́дице, спаси́ нас.
Умили́ся, уми́лостивися, умилосе́рдися, Влады́чице, / на мя, гре́шнаго и недосто́йнаго раба́ Твоего́, / дерза́ющаго воспе́ти Твоя́ чудеса́.
Ма́ти Бо́жия Пречи́стая, / не отри́ни мене́, окая́ннаго и нечи́стаго, / дерза́ющаго пе́ти Твоя́ чудеса́, Умиле́ние.
Слава: Ина́го прибе́жища и те́плаго предста́тельства / к Сы́ну Твоему́ и Бо́гу на́шему не и́мам, Всепе́тая, / те́мже сподо́би мя, многогре́шнаго, восхвали́ти Твоя́ чудеса́.
И ныне: Ле́ностию одержи́мь и страстьми́ обурева́емь есмь аз, / неключи́мый раб Твой, Влады́чице, / недоуме́ю по достоя́нию восхвали́ти и просла́вити Твоя́ чудеса́.
Песнь 3.
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Припев: Пресвята́я Богоро́дице, спаси́ нас.
Еди́н аз, окая́нный, житие́м согреши́х па́че всех челове́к, Пречи́стая, / но, на щедро́ты Твоя́ упова́я, зову́: / душе́внаго мя умиле́ния сподо́би.
Никто́же, прибега́яй с ве́рою под Боже́ственный Покро́в Твой, Влады́чице, / тощь от Тебе́ исхо́дит, / те́мже и аз, многогре́шный, дерза́я, зову́: / Боже́ственнаго мя умиле́ния сподо́би.
Слава: Иа́ков, ле́ствицу Боже́ственную ви́дев, рече́: / степе́нь Бо́жия сия́, Я́же еси́ Ты, Препе́тая; / те́мже молю́ Тя: / блага́го восхожде́ния к доброде́тели и мене́, лю́те недосто́йнаго, сподо́би.
И ныне: Ю́же всем благопослу́шную в ско́рбех и обстоя́ниих душе́вных и теле́сных / яви́ Тя Госпо́дь, Богоро́дице Блага́я, / та́ко и мне, лю́те обурева́емому страстьми́ безме́стными, сле́зы умиле́ния пода́ждь / и Твоего́, Де́во, Ма́терняго заступле́ния сподо́би.
Го́споди, поми́луй, трижды.
Седален, глас 5:
Превзыдо́ша главу́ мою́ греси́ мои́, Влады́чице, / оскверне́н и́ми есмь, и несть исцеле́ния в пло́ти мое́й, / но Ты, Многоблагоутро́бная, да́руй души́ мое́й сле́зы покая́ния на очище́ние скверн грехо́вных / и теле́сныя неду́ги уврачу́й, Врача́ вся́ческих и Го́спода ро́ждшая.
Слава, И ныне: Ра́ны душе́вныя привлеко́ша на мя и боле́зни теле́сныя, Влады́чице, / но Ты, я́ко Преми́лостивая, обоя́ исцели́, подава́ющи мне неоску́дный дар духо́внаго умиле́ния, / и да непреста́нно сла́влю Твое́ всемо́щное заступле́ние.
Песнь 4.
Ирмос: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: / сла́ва, Христе́, си́ле Твое́й.
Припев: Пресвята́я Богоро́дице, спаси́ нас.
Иде́же осени́т благода́ть Твоя́, Влады́чице, / та́мо вся́кая скорбь потребля́ется, весе́лие же водворя́ется, / ея́же и мене́, недосто́йнаго, сподо́би, вопию́ща: / ра́дуйся, Богоро́дице, всех ра́достей Ра́досте.
Слез не и́мам, окая́нный аз, ниже́ душе́внаго умиле́ния, / но Сама́, я́ко Милосе́рдая, сия́ ми пода́ти благоволи́, да взыва́ю: / ра́дуйся, Де́во Пречи́стая, всех ра́достей Ра́досте.
Слава: Не́мощна мя су́ща и окая́нна стру́пы грехо́вными, / уврачу́й, Пречи́стая, милосе́рдия Твоего́ еле́й излива́ющи, / и воздви́гни пе́ти Тебе́: / ра́дуйся, Влады́чице, всех ра́достей Ра́досте.
И ныне: Омрачи́хся умо́м в жите́йских сласте́х, / но Ты, Влады́чице, све́те помраче́нныя души́ моея́, разгони́ тьму страсте́й мои́х, / да просве́щся Тобо́ю, вопию́: / ра́дуйся, Неве́сто Неневе́стная.
Песнь 5.
Ирмос: Ужасо́шася вся́ческая / о Боже́ственней сла́ве Твое́й, / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ безле́тнаго Сы́на, / всем воспева́ющим Тя / мир подава́ющая.
Припев: Пресвята́я Богоро́дице, спаси́ нас.
Доко́ле поно́сит враг и низлага́ет до́лу мя, немощна́го и разсла́бленнаго лю́те душе́ю и те́лом: / умили́ся, Влады́чице, и низложи́ борю́щих мя враго́в, Всепе́тая, / души́ мое́й мир подава́ющи.
Вы́шши всех А́нгел и Арха́нгел яви́лася еси́, Чи́стая Богоотрокови́це, / те́мже молю́ Тя, стре́лы вра́жия, на мя изощре́нныя, сокруши́ти, / души́ мир подава́ющи.
Слава: Доко́ле, душе́ моя́, пребыва́еши в прегреше́ниих, конца́ не иму́щи грехо́вному обы́чаю, / возни́кни из глубины́ зол, взира́ющи держа́вному заступле́нию Пречи́стыя, всегда́ на по́мощь тебе́ ско́рыя / и благода́тию Свое́ю мир души́ и те́лу подава́ющия.
И ныне: Ра́дость, и весе́лие, и ра́дование Боже́ственное, / Де́во Неискусому́жная, нам умно́жися Бо́жие: / се бо, пла́чущиися лю́те, ра́дуемся моли́твами Твои́ми.
Песнь 6.
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.
Припев: Пресвята́я Богоро́дице, спаси́ нас.
Ра́дости Боже́ственнаго вели́чия, я́ко от нача́ла нам весе́лия, / благодаре́ния гла́сы прино́сим, / приле́жно почита́юще Ю́, я́ко Предста́тельницу на́шу.
Досто́йно Ти песнь ра́дования, Чи́стая Де́во, веселя́щеся, прино́сим, / изба́вльшеся от бед Твои́ми моли́твами.
Слава: А́нгельстии язы́цы досто́йно Твоя́ хвалы́ воспе́ти не мо́гут, Чи́стая, / мы же ны́не, ра́бски взе́мшеся, / ра́дование Гаврии́лово прино́сим Ти.
И ныне: Я́ко Боже́ственное прибе́жище, мы покро́в Твой вси стяжа́вше к Бо́гу, / в напа́стех, и в гоне́ниих, и гресе́х к Тебе́ прибега́ем / и Тобо́ю измене́ние прие́млем, Пречи́стая.
Го́споди, поми́луй, трижды. Сла́ва, и ны́не:
Кондак, глас 3:
Ю́же подража́я непло́дную смоко́вницу, / аз, окая́нный, умиле́ния плода́ отню́д не приношу́ и посече́ния страшу́ся, / но, взира́я к чудотво́рней ико́не Твое́й Умиле́ния, Влады́чице, / стеню́ от се́рдца и вопию́: / умили́ся, Благосе́рдая, / и мне, окамене́нному се́рдцем, / благоволи́ пода́ти душе́вное и серде́чное умиле́ние.
Превзыдо́х грехи́ мои́ми блудни́цу, и блу́днаго, и мытаря́, / и разбо́йника, и ниневи́тяны, аз еди́н, окая́нный па́че всех челове́к, / и, лиши́вся благода́ти и дерзнове́ния ко Го́споду, стеню́ от се́рдца и вопию́: / Тя Хода́таицу и Спору́чницу спасе́ния многогре́шней души́ мое́й благосотвори́, / подаю́щи ми душе́вное и серде́чное умиле́ние.
Песнь 7.
Ирмос: Не послужи́ша тва́ри Богому́дрии / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.
Припев: Пресвята́я Богоро́дице, спаси́ нас.
Ре́ку неисчерпа́емую ми́лости Твоея́ / к гре́шным всем, Влады́чице, излива́еши, те́мже молю́: / напои́ мою́ жа́ждущую ду́шу и изсо́хшее грехи́ се́рдце мое́ ороси́, да, благословя́, воспою́: / препе́тый отце́в Госпо́дь и Бог, благослове́н еси́.
Я́же всем благопослу́шная в ско́рбех и обстоя́ниих душе́вных и теле́сных, Влады́чице, / не отве́ржи и мене́, недосто́йнаго, но сподо́би пе́ти: / отце́в Госпо́дь и Бог, благослове́н еси́.
Слава: Не отри́ни, Богоро́дице, мене́, уязвле́ннаго сове́том змии́ным, / не возгнуша́йся мене́, смра́днаго грехи́ мно́гими, / но сподо́би всегда́ пе́ти: / отце́в Госпо́дь и Бог, благослове́н еси́.
И ныне: Егда́ престо́ли на Суд поста́вятся и Суди́щу Христо́ву предста́нут вси земноро́днии, / тогда́ яви́ мне, Влады́чице, Ма́тернее Твое́ заступле́ние, неоску́дную по́мощь, вопию́щу: / отце́в Госпо́дь и Бог, благослове́н еси́.
Песнь 8.
Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо о́бразу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.
Припев: Пресвята́я Богоро́дице, спаси́ нас.
Стра́ха мя изба́ви, о Влады́чице, зло́бы и возду́шных мыта́рств. / Покажи́ на мне, недосто́йнем, ве́лию ми́лость Твою́, воспева́ющем: / Го́спода по́йте, дела́, и превозноси́те Его́ во вся ве́ки.
Изба́ви мя, Пренепоро́чная, озлобле́ния злых челове́ков и лука́вых бесо́в, / трепе́щут бо и́мене Твоего́ вели́каго, я́ко дым исчеза́ют; / мене́ же во умиле́нии се́рдца сподо́би пе́ти: / Го́спода по́йте, дела́, и превозноси́те Его́ во вся ве́ки.
Слава: Те́мныя вла́сти кня́зя, всегда́ борю́щаго мя, немощна́го и уны́лаго, разжже́нныя стре́лы угаси́, Всепе́тая, / и сподо́би мя благода́рственно воспева́ти: / Го́спода по́йте, дела́, и превозноси́те Его́ во ве́ки.
И ныне: Пе́ние мое́ приими́ убо́гое, Всеми́лостивая Госпоже́ Де́во, Влады́чице Богоро́дице, / Ма́терним Твои́м милосе́рдием покрыва́ющи пою́щия: / Го́спода по́йте, дела́, и превозноси́те Его́ во вся ве́ки.
Песнь 9.
Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная Богоро́дице, / Чи́стая Присноде́во.
Припев: Пресвята́я Богоро́дице, спаси́ нас.
Егда́ изнемога́ти кре́пости мое́й / во исхо́де души́ мое́й гре́шней от окая́ннаго и скве́рнаго сего́ телесе́, / тогда́ наипа́че яви́ на мне, недосто́йнем, кре́пкую мы́шцу Твою́, Всеблага́я, / даждь в час сме́рти моея́ ра́достно взыва́ти Тебе́: / ра́дуйся, Всеблаже́нная Богоро́дице, Чи́стая Присноде́во.
Нищ и убо́г есмь от дел благи́х, не имы́й умиле́ния душе́внаго, Преми́лостивая, / Ты Сама́ да́рствуй ми, да благода́рственно вопию́: / ра́дуйся, Всеблаже́нная Богоро́дице, Чи́стая Присноде́во.
Слава: Иссо́пом милосе́рдия Твоего́ окропи́ мя, Пречи́стая, / да очи́щуся от тя́жких и лю́тых беззако́ний мои́х и во умиле́нии души́ да взыва́ю от се́рдца: / ра́дуйся, Всеблаже́нная, Чи́стая Присноде́во.
И ныне: Е́же помы́слих в души́ мое́й, по си́ле принесо́х пе́ние Тебе́, Влады́чице, / не отри́ни у́бо обы́чным Твои́м милосе́рдием / и не омерзи́ мно́ю, многогре́шным и нечи́стым, / но сподо́би всегда́ во умиле́нии пе́ти Тебе́: / ра́дуйся, Всеблаже́нная Богоро́дице, Чи́стая Присноде́во.
Светилен.
Те́плое заступле́ние в беда́х, и Помо́щницу, и к Бо́гу примире́ние, / Е́юже тли изба́вихомся, / Богоро́дицу, ве́рнии, ублажи́м.
Слава, И ныне: Тя Предста́тельницу и́мамы, гре́шнии, о Пречи́стая Де́во, / Ты благопремене́нна сотвори́ Сы́на Твоего́ и Бо́га на́шего / Ма́терними Твои́ми моли́твами.
Молитва:
О Пресвята́я Госпоже́ Влады́чице, Богоро́дице Де́во! Приими́ недосто́йныя моли́твы на́ша, сохрани́ нас от наве́тов злых челове́к и от напра́сныя сме́рти, пода́ждь нам пре́жде конца́ покая́ние, на моле́ния на́ша умилосе́рдися и ра́дость в печа́ли ме́сто да́руй. И изба́ви нас, о Госпоже́ Влады́чице Богоро́дице, от вся́кия беды́, напа́сти, ско́рби, боле́зни и вся́каго зла, и сподо́би нас, гре́шных рабо́в Твои́х, одесну́ю ста́ти во второ́м прише́ствии Сы́на Твоего́, Христа́ Бо́га на́шего, и насле́дники нас бы́ти сподо́би Ца́рствия Небе́снаго и жи́зни ве́чныя со все́ми святы́ми в безконе́чныя ве́ки. Ами́нь.
Молитва иная:
Приими́, всеблагомо́щная, Пречи́стая Госпоже́, Влады́чице Богороди́тельнице, сия́ честны́я дары́, Тебе́ еди́ней прикла́дныя, от нас, недосто́йных рабо́в Твои́х: от всех родо́в и́збранная, всех тва́рей Небе́сных и земны́х вы́сшая я́вльшаяся, поне́же бо Тебе́ ра́ди бысть Госпо́дь Сил с на́ми, и Тобо́ю Сы́на Бо́жия позна́хом и сподо́бихомся свята́го Те́ла Его́ и пречи́стыя Кро́ве Его́; те́мже блаже́нна еси́ в ро́дех родо́в, Богоблаже́нная, херуви́мов светле́йши и серафи́мов честне́йши су́щая. И ны́не, всепе́тая Пресвята́я Богоро́дице, не преста́й моля́щися о нас, недосто́йных рабе́х Твои́х, е́же изба́витися нам от вся́каго сове́та лука́ваго и вся́каго обстоя́ния и сохрани́тися нам неврежде́нным от вся́каго ядови́таго прило́га диа́вольскаго; но да́же до конца́ моли́твами Твои́ми неосужде́нных нас соблюди́, я́ко да Твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся в Тро́ице Еди́ному Бо́гу и всех Созда́телю возсыла́ем, ны́не и при́сно, и во ве́ки веко́в. Ами́нъ.
Акафист Пресвятой Богородице пред иконой «Умиление» (Псково-Печерская)
Кондак 1
Избранней Заступнице рода христианского, покрывающей и спасающей люди правоверныя, иноком благоскорбящим Подательнице вечнаго радования, благодарственная от души восклицаем пения. Ты же, яко нарекшаяся Умиление, призри на ны милостивно и умиление нам даруй, да со дерзновением воспеваем Ти радостно:
Радуйся, Всеблагая Владычице, умиление и спасение наше.
Икос 1
Ангели и Архангели и множество сил небесных немолчно восхваляют Тя, Царицу всех и Владычицу. Ты же сподобила еси и нас бренными устнами воспевати дарованную Тобою радость в явлении чудныя Твоея иконы с предвечным Младенцем. Сего ради приими от нас похвалы сия:
Радуйся, Архангели певаемая; радуйся, Ангели славословимая.
Радуйся, небесными силами возносимая и окружаемая; радуйся, славо преподобных и мученик.
Радуйся, верных чад Церкви несумненное радование; радуйся, иноком в подвизех поспешествующая и наставляющая.
Радуйся, Умиление нарекшаяся; радуйся, умиление просящим дарующая.
Радуйся, единая Надеждо наша; радуйся, Отрадо в смертный час.
Радуйся, непрестанно Сына Твоего умоляющая.
Радуйся, Всеблагая Владычице, умиление и спасение наше.
Кондак 2
Видяще небожители Тя, Всеблагую Матерь, непрестанно молящуюся пред Престолом Божиим за человеческий род, прославиша Господа, даровавшаго таковую Заступницу верным, хвалебною песнию: Аллилуиа.
Икос 2
Разум даровася верным, чудотворный лик Твой зрящим и чудеса Тобою изливающаяся, слагати песни и пения ко прославлению имене Твоего честнаго, Всеблагословенная. Ты же милостивно приими от нас похвалы сия:
Радуйся, чудо чудес православия; радуйся, возводящая нас на небо.
Радуйся, Милостивая, нас милующая; радуйся, Своим омофором от зла покрывающая.
Радуйся, Господь с Тобою и Тобою с нами; радуйся, вся воздыхания наша милостивно приемлющая.
Радуйся, в час скорби единая наша Отрадо; радуйся, грешных усердная Споручнице.
Радуйся, кающихся твердый столпе; радуйся, о падших слезы проливающая.
Радуйся, защищающая сирых и вдовиц.
Радуйся, Всеблагая Владычице, умиление и спасение наше.
Кондак 3
Сила Господня осени Тя и подвиже на помощь и заступление всем, к чудотворней иконе Твоей прибегающим и поклоняющимся ей. Видяще сие, людие с трепетом припадаша Ти и песнопояху Бога песнию: Аллилуиа.
Икос 3
Имущи древняя обитель Псково-Печерская Твой образ святый, Преблагословенная Богородице Дево, токи чудес источающий и обитель ограждающий от всякаго зла, исполнишася велия радости и утешения. Се бо Матерь Света крылома Своея Материнския любве ограждает ны, вопиющих умильно:
Радуйся, радосте наша пресветлая; радуйся, ликование верных сердец.
Радуйся, свет нам возсиявшая; радуйся, обитель милостию Твоею посетившая.
Радуйся, в залог любве икону Твою ей даровавшая; радуйся, яко тою иконою точатся исцеления.
Радуйся, обитель Свою охраняющая; радуйся, живущим в ней присная Помощнице.
Радуйся, иноков Мати чадолюбивая; радуйся, обетов иноческих страж неусыпный.
Радуйся, радость всему миру носящая.
Радуйся, Всеблагая Владычице, умиление и спасение наше.
Кондак 4
Бурею злочестивых нашествий одержимии, благовернии людие града Пскова, Тя чтуще и цельбоносную Твою икону «Умиление» приемши, воздвигша ту на стены града противу воев Баториевых. Ты же, чудо деющи, защитила град от смертоносных стрел вражиих и подвигла верных пети благодарне рожденному Тобою Богу: Аллилуиа.
Икос 4
Слышаша жителие града Пскова и всея страны Российския величие чудес Твоих, како явила еси их во испытании бывшим от воев зверонравных, прославиша Тя, великую Заступницу страждущих, пении сими:
Радуйся, скорби наша на радость претворяющая; радуйся, прибегающим к Тебе скоро помогающая.
Радуйся, града Пскова ограждение; радуйся, злую дерзость воев поправшая.
Радуйся, стены града охранившая; радуйся, от смертоносных стрел врага покрывшая.
Радуйся, теми люди Твоя возвеселившая; радуйся, надеждою православных снабдевшая.
Радуйся, крепосте наша и защищение; радуйся, благоуханная Цевнице Небеснаго Царя.
Радуйся, кроткая горлице мира.
Радуйся, Всеблагая Владычице, умиление и спасение наше.
Кондак 5
Боготечную звезду, честную икону Твою, показала еси обители и веси Печерстей, Владычице Мира! К нейже, вернии, зряще и любовию ю лобызающе, взываем: буди нам щит и ограждение, да вопием Богу: Аллилуиа.
Икос 5
Видеша ближнии и дальнии, како Твой образ святый «Умиление» точит исцеления всем немощствующим, прибегоша к Тебе в скорбех и болезнех, и никто же от Тебе тощь и неутешен отъиде, и бысть во отраду Твой образ святый. Сего ради вернии благодарне зовут:
Радуйся, немощей наших отгнание; радуйся, смертоносных язв исцеление.
Радуйся, в бедах скорая Утешительнице; радуйся, бесов Прогонительнице.
Радуйся, града Печер украшение; радуйся, обители Печерския стено и ограждение.
Радуйся, иноков Небесная Игумение; радуйся, о добродетельном житии промыслительно пекущаяся.
Радуйся, в напастех стено нерушимая; радуйся, отчаянных грешников пристане.
Радуйся, недоумевающих разуме.
Радуйся, Всеблагая Владычице, умиление и спасение наше.
Кондак 6
Проповедницы быша чудеса от святыя иконы Твоея, Владычице, ибо слепии прозирают, болящии исцеления получают, сего ради вернии людие во множестве во обитель стекахуся, чающе получити милости Твоя, Всеблагая Царице небесе, лики своя со иноческими гласы совокупляху и в веселии зваху: Аллилуиа.
Икос 6
Возсия благодать Божественная чрез икону Твою чудотворную, Владычице, верою и любовию Тя Матерь Божию исповедующим, в нейже приемлюще и душевных недуг врачевание и к Царствию Небесному приобщение, смиренно возгласиша Ти сице:
Радуйся, не тела токмо, но и души спасительнице; радуйся, слезы чад Своих отирающая.
Радуйся, силу любве нам являющая; радуйся, безприютных вечный чертоже.
Радуйся, бездны греховныя бане; радуйся, чаше, омывающая совесть.
Радуйся, веры лучезарное сокровище; радуйся, надежды на спасение каменю.
Радуйся, адаманте Христовой любве; радуйся, скорбящим подательнице вечнаго радования.
Радуйся, покрове чистоты и девства.
Радуйся, Всеблагая Владычице, умиление и спасение наше.
Кондак 7
Хотяще оставити мир сей растленный, на святей горе боголюбезнии старцы преподобнии Марк и Иона подвизастася и обитель Святыя и Пречистыя Девы создаста, преподобный же игумен Корнилий образ Владычицы ту водвори, да вернии надежную Помощницу имут и взывают согласно: Аллилуиа.
Икос 7
Новую и преславную Твою икону «Умиление» видяще, на ограждение обители Псково-Печерския предпосланную, и радующеся вельми, боголюбивии иноцы и вернии людие возопиша прилежне:
Радуйся, славо пророков прекрасная; радуйся, благодатное небо.
Радуйся, в скудости пище обильная; радуйся, духовною радостию всех питающая.
Радуйся, в подвизе поста Помощнице; радуйся, печали всякия утоляющая.
Радуйся, злобная сердца умягчающая; радуйся, наша пред Сыном споручнице.
Радуйся, с Богом принесшая мир; радуйся, тайны от века явление.
Радуйся, цвете благоуханный девства.
Радуйся, Всеблагая Владычице, умиление и спасение наше.
Кондак 8
Странное и преславное чудо бысть Твой лик, Преблагословенная, верным с иконы сияющий: еще бо преподобный Корнилий пред образом Твоим моли Тя, да оградиши верных чад обители от всякаго зла, нас же научиши воспевати Всеблагому Богу, даровавшему нам Тебе, Матерь Свою: Аллилуиа.
Икос 8
Весь бе грехми отягчен и отчаян в своем житии кающийся грешник, в слезной молитве к Тебе прибеже, прося, да испросиши пред Сыном Твоим и Богом прощение грехов его, и восклицаше званьми сими:
Радуйся, кающихся грешников утешение; радуйся, грехов прощение.
Радуйся, всяку слезу отъемлющая; радуйся, солнце, согревающее люди.
Радуйся, отрадо, даруемая верным; радуйся, христиан Небесная Мати.
Радуйся, нераскаянных грешников исправление; радуйся, благоухание Небеснаго Царя.
Радуйся, молитве нас научающая; радуйся, помощь в бедах обильная.
Радуйся, страх нощный прогоняющая.
Радуйся, Всеблагая Владычице, умиление и спасение наше.
Кондак 9
Всяких сил ангельских превысшую Деву немолчно Тя хвалят наша сердца, Тя истинно чистейшую светлостей солнечных непрестанно величают. Ты же Ходатаица о нас буди в день Страшнаго Суда к Сыну Твоему и Богу, воспомяни тогда грешных моления и сподоби пети Богу: Аллилуиа.
Икос 9
Витий многогласных язык не возможет воспети достойно Твой сладостный лик, о, Дево и Мати Владычице. Чудных Твоих даров и неизреченных красот умножение сердца исполняет умиления и дарует очесем источники слез, и подвизает вопити в сокрушении:
Радуйся, сердец росо умиления; радуйся, надеждо всех безнадежных.
Радуйся, всех правды лишенных прибежище; радуйся, демонов злых прогонительнице.
Радуйся, грозно бесом запрещаеши; радуйся, унылых духом востание.
Радуйся, яко вся возможна Тебе; радуйся, стропотных душ вразумление.
Радуйся, палице спящим сном греховным; радуйся, сладость всем, в горьких работах сущим.
Радуйся, всех скорбящих Радосте.
Радуйся, Всеблагая Владычице, умиление и спасение наше.
Кондак 10
Спасти хотящи верныя люди, явилася еси о них Предстательница пред Богом на стогнах града Пскова, милость Свою явльши, икону Твою чудотворную предпостави изряднее воем Баториевым. Людие же, чудо видяще, велиим гласом пеша Тебе: «Царице моя Преблагая!» и восклицаша Богу: Аллилуиа.
Икос 10
Стена еси иноком, Пречистая Дево, от вражиих козней, от бед, скорбей и напастей, Тебе бо вручи нас преподобнии Марк, Иона и Корнилий, бысть же ходатаица и праведная Васса. Сего ради смятенный наш дух возносим в смиренной мольбе, взывающе:
Радуйся, верных Твоих утверждение; радуйся, чад Своих любящая.
Радуйся, граде Царя, всеми прославляемый; радуйся, Церкве Святыя похвало и радование.
Радуйся, горних умов ликование; радуйся, неверных ко Христу приводящая.
Радуйся, Заступница наша усердная; радуйся, спасающая сущих в бедах.
Радуйся, нечестивых воев попрание; радуйся, добродетельми украшенная.
Радуйся, иноков ликование обильное.
Радуйся, Всеблагая Владычице, умиление и спасение наше.
Кондак 11
Пение хвалебное приносяще Ти, Всепетая, неудобства всякаго избавляемся. Твой образ честный усердно целующе, молим Тя: даруй нам веру несумненную, братолюбие и мир душам нашим ниспосли, да в мире и тишине вопием: Аллилуиа.
Икос 11
Светоприемная свеща была еси, Пречистая Дево, светом небесным озаряющи наш путь, и далече отступи от нас всякая неправда и беззаконие. Сего ради благодарственно вопием Ти:
Радуйся, свете немеркнущий жития нашего; радуйся, Лествице, возводящая к небесам.
Радуйся, облаче всесветлый; радуйся, скиние Небеснаго Царя.
Радуйся, рождшая Зиждителя вселенныя; радуйся, Тя бо блажат вси роди.
Радуйся, воспеваемая Херувимы и Серафимы; радуйся, дождю, орошающий благочестивыя души.
Радуйся, кладезю любве и милосердия; радуйся, грозная отмстительнице клянущихся всуе.
Радуйся, от клеветы нас избавляющая.
Радуйся, Всеблагая Владычице, умиление и спасение наше.
Кондак 12
Благодать Ти дана от Господа Своим святым покровом покрывати Церковь Православную от неверия, ересей и раскола, чад же верных Церкве миром ограждати и вразумляти на добродетели, да непрестанно славят Бога песнию: Аллилуиа.
Икос 12
Поюще Тя, Дева Всепетая, и чтуще чудотворную икону Твою «Умиление», во обители Псково-Печерстей сущую, радуемся по долгу, видяще Тя, Заступницу и Помощницу усердную всем, хотящим жати спасение и воспевати на всяк день:
Радуйся, Мати, Тебе мое моление; радуйся, крине удолия рая.
Радуйся, райския пищи приемнице; радуйся, сею пищею и нас питающая.
Радуйся, иноком благоскорбящим подательнице вечной радости; радуйся, праведных жен украшение.
Радуйся, краю благих желаний; радуйся, мученик всех дерзновение.
Радуйся, Церкве хоругве пречестная; радуйся, жития сокровище вечное.
Радуйся, свещниче веры златый.
Радуйся, Всеблагая Владычице, умиление и спасение наше.
Кондак 13
О, Всепетая Мати, Царице небесе и земли! Иноков благая Вратарнице, верных покрове и умиление! Нынешнее приемши пение, от всякаго избави ны злаго обстояния и не лиши ны радости Царства Небеснаго, да вопием прилежно: Аллилуиа.
Этот кондак читается трижды, затем 1-й икос «Ангели и Архангели…» и 1-й кондак «Избранней Заступнице…».
Молитва
О, Преблагословенная Дево Богородице Владычице! Мати всех страждущих и болезнующих сердцем! Страны нашея и града Защитнице! Обители Псково-Печерския красото и славо! Призри на нас смиренных, обремененных грехи многими, отягченных скорбьми и печалями и с сокрушением и слезами взирающих на пречистый лик Твой, в чудотворней иконе явленный. Сохрани от всякаго зла святую обитель сию, юже преподобный Корнилий со старцы Марком и Ионою Тебе вручи, и всех в вере и надежде подвизающихся в ней. Спаси и град сей, и вся люди, правоверно живущия и к Тебе прибегающия, от нашествия иноплеменных, от всякаго страха и труса, от мора и глада, от злых человек и всяческия скорби. Приникни к нам милосердием Твоим, яко ликом Твоим Божественным любезно приникла еси к ланите Богомладенца. Согрей нас дыханием Твоея любве и никогдаже отступай от нас, ни в сей жизни, ни в будущей, да, чающе Твою всесильную Материнскую помощь, сподобимся безбедно дойти вечныя жизни и прославляти Небеснаго Отца и Сына и Святаго Духа, в Троице славимаго Бога, во веки веков. Аминь.